Sunday May 31st 2020

Archives

விரோதி ஆண்டின் மே – 18

விரோதி ஆண்டின் மே18,ஏ…
ஜனனாயக நீதி யாழரென்று
இனப் படுகொலை செய்திடும்
கபடதாரிகளின் நண்பன் நீ

கொலைஞரோடு கொலைஞனாய்
தடம் பதித்து நீ மெல்ல நடந்திட
வடம் பிடித்து நாம் ஆண்ட மண்ணில்
வரப்பிழந்தோம்
வகை இழந்தோம்
மலையென குவிந்த எமதினத்தின்
பிணக் குவியல் கண்டு
தாளாது
ஏந்திய ஆயுதங்களை மெளனித்தோம்

உலகத்தோர் நிலம் வேண்டி
கன்னம் இட்டோமா
வஞ்சனை வலை விரித்து
இனப் படு கொலைகள் புரிந்தோமா

நெறி முறை யுத்தம் பகன்று
வெறிகொண்ட சிங்கத்தின்
கதவடைத்து
வசந்தம் அழைத்து
வாழ்ந்திருந்தோமே

ஏ…விரோதி ஆண்டின் மே18,ஏ…
ஐக்கிய இலங்கை என்ற உக்கிய
வார்த்தையை சொல்லிச் சொல்லி
சுற்றம் எரித்த கொற்றவரெனும்
கொடுமையாளரினால்
உன் குடையாணி சாய்ந்ததை
நீயும் அறிவாய்
சத்தம் இன்றி சந்தடி இன்றி
எம் தாயக மண்ணில்
ஐந்தாம் உலகப் போரை அரங்கேற்றிய
அரக்கன் எனும் விரோதி ஆண்டே

ஜனனாயக நீதி யாளரெனும்
கொடியோர் வீசிய பொஸ்பரசால்
கொடும் விசம் குடித்த
புது மாத்தளன் உப்பேரிக் காத்து

பொட்டல் காட்டின் நடுவே
மண்ணில் புதைக்கப் பட்ட
மனிதப் புதை குழிகளுக்குள்
மாண்டோரின் உஸ்ணம் தொட்டு
தொலைந்து போன தார்மீகத்தை
தேடிக்கொண்டிருக்கிறது

காற்றாக மழையாக ஒளியாக
உலகை ஆழும் இயற்கை போல்
எம்மில் பதிந்த
பயங்கரவாதத் தடைக் கல் அகற்றி
தன் மெளனம் கலைக்கும்

பெரும் பான்மை சிங்களத்தின்
செருக் கறுக்கும்
தமிழீழ மண்ணிலே முடி சூடும்
விரோதி ஆண்டின் மே 18,ஏ…
அன்றுதான்
நீ எங்கள் ஆத்ம நண்பன்.

கவியாக்கம் – வல்வை சுஜேன்.

Leave a Reply